Musicianship

咦？點解呢篇唔係關於音樂嘅？

你可能見到呢篇文章嘅標籤冇 #音樂 ，咁係因為⋯⋯冇錯，呢篇文章同音樂無關。我今晚反而想講一啲關於生活態度嘅嘢。

近排我同我同學以一個樂隊嘅身份參加咗一個音樂訓練活動，經歷過一輪訓練之後，我哋會喺 7 月尾上台表演。呢個活動看似冇乜嘢，但係我哋似乎唔係好滿意主辦單位某啲嘅安排，導致我哋有意無意咁遲到或者缺席一啲訓練活動¹。最終，主辦單位對呢件事唔滿意，就喺今日檢討會同我哋講呢件事，我哋更加因為呢件事喺 WhatsApp 嘈咗一陣。

我對我哋呢一個樂隊嘅感覺

（如果你係 band 友，你真係唔好介意我咁講）我由上年 11 月開始同佢哋玩唔同嘅歌，到依家一齊參加唔同運動，我發現我始終唔可以同佢哋融合起嚟。我唔知我係咪真係 I 到爆啦，但係我覺得呢個 group 怨氣有啲重，尤其佢哋不時都對唔同同學有啲「獨特」嘅意見，有啲人仲趁其他人唔係度嘅時候講佢哋壞話。雖然呢啲說話都係一句起兩句止，但係我聽到呢啲說話之後，我就會覺得假如某一日我唔係度，佢哋說話嘅對象就會係我。所以，我喺聚會入面，最 high 最多嘢講嘅時間就係真係夾歌同埋坐埋一齊打機嘅時候，因為呢啲時候我最唔會聽到佢哋講人是非，相處起嚟都係最開心嘅。但係喺其餘時間，不論搭車抑或食飯，我真係可以一粒聲都唔出。

人人都唔係完美

我喺上面嗰段咁樣話人，唔通又唔係講緊人哋是非咩？或者佢哋講人是非嘅時候，都只係有感而發。而我哋要記住嘅，係當我哋用手指指住其他人嘅時候，其餘三隻手指都係指住自己。冇人嘅處事態度係完美嘅，我就算唔計我喺今次活動表演不足嘅地方，我喺更加先前嘅表演，已經發現自己處事態度未去到最好。

今年年頭我同佢去西九做 show，其實嗰次係冇乜嘢嘅，但係我上台 setup 嘅時候，手腳太亂，支結他有啲重，條 jack 線又未解開到，所以 audio/stage 個邊啲人向我抱怨咗一下：

喂到時邊個幫你解開 jack 線？

呢一句對我嚟講簡直入心入肺，亦都成為我買 新結他 同埋 wireless system 嘅導火線，從而令到我喺台上 setup 嘅流程更加暢順。

所以，講人哋是非之前，你可以喺你自己心入面爆一次你自己嘅是非。或者咁樣，你就會冇咁想再講人哋是非。

表演前嘅檢查列表

呢幾次經歷再提醒我一次做人好緊要。Musicianship 嘅精髓唔係在於你技術彈得幾好，而係你對你自己嘅每一場表演，每一次活動究竟擺咗幾多心機落去。接下來我會整一個檢查列表，提示自己係咪喺每一場表演/活動做到最好。如果你覺得有用，歡迎將佢儲存喺你部電話到！

1. 表演曲目 🎵

• 即使好簡單，你有學好每一首要表演嘅曲目嗎？
• 你有將最簡單嘅音符（包括 do re mi fa so fa mi re do）演繹得最貼切嗎？
• 你能夠代入每一首曲目嘅感情嗎？

2. 樂器 🎸

• 你有為每一首曲目調配最好嘅音色嗎？
• （電結他）你決定好每一首歌用咩 pickup，tone knob 攞幾多嗎？

3. 舞台 🎇

• 你有顧及每一首曲目應有嘅台風嗎？
• 你可以快速檢視當日舞台/audio 嘅設計，從而應變嗎？
• 你有事先預習 setup 同埋拆嘢嘅程序嗎？上到台會唔會手忙腳亂？

4. 待人接物 🤝

• 你有預留充足時間到達表演場地嗎？
• 無論你當日心情/健康狀況如何，你會否以最佳嘅態度示人嗎？
• 無論你當日心情/健康狀況如何，你能夠保持恰當嘅處事方式嗎？

人生太過辛苦，請不要為自己施加更多壓力

最後我想講一樣嘢就係，有啲嘢開開心心過咗去咪得囉。我哋音樂路上一定有一啲不如意嘅活動，哪怕係場地唔符合我哋要求，以及完全唔合理嘅排練時間及長度，尤其是寫完上面嘅列表，與其抱怨呢啲情況，倒不如喺其中搵到快樂嘅地方，其實呢啲唔合理嘅嘅嘢，我哋都可以玩得好開心。

（如果我漏咗任何程序，歡迎 email 到 michael228p@fastmail.com 提我，等我可以更新呢個列表，令咁多人受惠！）