逃生門與電子鎖

最近，我喺宿舍發現一件好不可思議嘅事。

你睇吓道逃生門嘅右邊，竟然安裝咗一個電子鎖！你哋可能對呢種鎖唔係好認識。有裝上呢種鎖嘅門通常只限某一啲人進入，你係要嘟卡嘅¹。

但係！呢個係一個好重要嘅但係：我，作為一個住宿學生，係開唔到呢道門嘅。

防火門應常關

但係你哋有冇聽過防火應正常「鎖」？裝呢種鎖喺逃生門簡直害死宿生。雖然，我有留意過如果大廈響 alarm 嘅話呢個鎖喺會解除嘅，但係：

1. 你可以確保每一次響 alarm 嘅時候個鎖都會自動解除？
2. 你可以確補每一次真係發生火警嘅時候啲 sensors 會 detect 到熱力，從而觸發 alarm？

已經唔係第一次

住咗喺度幾個月左右，我已經唔係好相信呢度嘅設備：

• 洗衣機同乾衣機成日壞；
• 我間房連接走廊通道嘅門已經唔可以正常打開，要反方向扭個門鎖先開到道門；
• 入口閘機一個禮拜內壞幾次，要由行間幫手手動開門。

我不禁咁諗：

有一日，呢啲事件發生喺逃生門上面，萬一發生火災，全棟大廈嘅人應該玩完。

睇景嘅代價

我好慶幸自己住低層，雖然睇唔到靚景，但係萬一要逃生嘅時候，我都唔會比呢啲反智設計搞死。😌