脊柱側彎

話說同我好熟嘅朋友都知道，我喺小學四年班嘅時候被發現患有脊柱側彎，當時已經去到四十度，已經去到要做手術嘅臨界點。

時間快轉到 2025 年，我條腰已經彎到六十度，但係⋯⋯我依然未做手術。雖然係咁，我條腰嘅痛感已經少咗好多！

大口環兒童醫院

我已經認識咗呢個老地方八年，前日仲要以大學生嘅身份去嗰間醫院復診，我着住便服好悠閒咁走入大堂，見到好多小朋友着住便服趕緊功課（當時係朝早九點）。照 X 光嘅時候啲小朋友唔識姿勢，則邊啲人係咁叫佢哋舉高啲隻手，搞好耐，而我一兩分鐘就搞掂。我嗰時覺得自己就係呢間醫院嘅大哥哥！🤣

（Google Map 上嘅大口環醫院，側邊嘅環境感覺好舒服！）

（印象中）一般脊柱側彎患者嚟大口環復診嘅時候大嘅會跟住以下流程：

1. 登記俾錢；
2. 見支架部門，睇吓個支架有冇地方需要調整；
3. 見物理治療師，約略檢查身體同埋重溫強化身體肌肉嘅運動；
4. 照 X 光；
5. 踱高磅重；
6. 見醫生；
7. 感到焦慮，因為醫生一定會同你講你條腰嘅情況越嚟越差。

而我當日就跟住以下流程：

1. 之前已經俾咗錢；
2. 照 X 光；
3. 見醫生（今次同上次個醫生都好正面😝話我冇乜問題）；
4. 俾錢買 X 光片（等陣同你講點解）。

所以今次復診感覺好快就完咗！一年前到依家我亦都留意到有啲嘢唔同咗：

1. 真係多咗好多人睇症🥲；
2. 搭去醫院嘅小巴（58 號）真係有好多人排隊，條龍排到去 A 出口隔籬；
3. 醫院門口加咗塊 LED 螢幕，顯示小巴路線到站嘅時間。

總言之，今次復診嘅體驗算係幾愉快，如果你都有脊柱側彎，我有幾個建議：

1. 千祈唔好跟住政府提供俾你嘅治療。你咁樣做，已經贏咗 99.9% 嘅脊柱側彎患者。依家我嘅物理治療運動，甚至係我嘅支架，都係嚟自一間私家嘅公司 ，效果好過政府嗰啲好多。除此之外，我定時有去其他診所做治療（一個喺銅鑼灣、一個喺油麻地）每次做完都覺得條腰舒服咗。呢個亦都係我復診流程短過其他人嘅原因。我買 X 光片嘅原因就係要比私家醫生睇睇我條腰。

2. 就算跟政府嗰套治療，唔好咁快屈服做手術。醫生一定有同你講過青春期生長嘅階段係你條腰最容易惡化嘅時間，每次復診個醫生都會同你講條腰彎 1-2 度，又會叫你做手術⋯⋯其實去到我呢個年紀，啲骨會慢慢定形，情況就唔會繼續惡化。如果你一直都 keep 到呢個彎度，你呢段時間都未必需要做手術。

3. 多啲游水。游水係對背脊壓力最低嘅運動，蛙式自由式都得，隨你鍾意！但係唔好游咁快，游到喘氣，因為咁樣你會吸氣吸到上胸，會惡化上面脊骨嘅彎道。

4. 留意吓自己平時嘅姿勢，記得時刻挺直！

如果我做咗手術，我呢一世都喐唔到條腰。所以，我真係要多謝咁多年嚟照顧我嘅醫生同埋物理治療師，咁樣我先可以自由自在咁生活落去！