對角行人過路處：後記

上個禮拜（2 月 24 號），我交功課交咗篇關於「對角行人過路處」嘅說明文。如果你有興趣，你可以喺呢度 睇睇篇文。

我從唔同嘅途徑得到說明文文入面資料，包括報章、立法會會議紀錄⋯⋯我更加到咗現場蒐集咗一啲資料。

而我喺現場收集到同埋見到嘅嘢，再對比番會議紀錄嘅對話⋯⋯令我有啲嘢想講。

其實你哋試緊咩嘢？

始終每一個路口的綠燈時間是有限的，燈號的設計要同時照顧所有出行人士，包括行人和車上乘客的需要，合理地分配燈號時間，保持交通暢順。

首先， 除了便利行人，還要一併看看車輛是否有足夠的綠燈時間通過路口，避免出現交通擠塞。另外，要在路口加設對角過路處， 需要安排一個「全綠公仔」的時段 ， 讓行人可以安全地打斜橫過馬路。同時，我們也要確保對角過路處的設計不會影響行人和行車的道路安全。我們要小心考慮加設過路處後，會否有機會令一些橫過傳統過路處的行人的等候時間延長，對行人構成不便。

政府話佢地設置對角過路處嗰陣，考慮咗好多因素，但係實際操作係點樣？

我紀錄同比較咗沙田試點同埋隔離十字路口（相距 170 米）嘅 phase 長度：

你會發現，其實兩個路口嘅交通燈時段只係差兩秒。兩個路口最大嘅分別就係對角線嘅人像燈早大約 10 秒開始閃爍（但係所有人像燈同一時間綠轉紅）。而且沙田圍站附近都係住宅區，不嬲都唔係好多車。呢個分別對車輛或者行人嘅影響，可以話係好少。 （我知道我喺篇說明文都寫過呢件事，但係我喺說明文都要保持客觀。）

合法化

我覺得設立對角過路處嘅目的，只係合法化「對角過馬路」呢個行為。設立對角過路處之前其實好多人都會打斜過馬路（包括你同我，唔使扮嘢 🙂‍↔️）。我覺得政府唔使花咁多錢整呢啲人像燈。諷刺嘅係隔離十字路口好多學生都會咁樣打斜過馬路：

整對角過路處嘅時候點解唔順便整埋呢度？

既然係咁，點解唔好似六十年代咁，喺呢啲路口加返「白格過路處」？

但是，我們認為，其實我們是想令行人用最快的速度過馬路，而打斜到對角是最快的，如果我們不是這 樣畫，容許行人在四方格中周圍行走，行人會增加碰撞的機 會，而他們在中間逗留的時間亦會較長，以致他們未必能夠在 燈號結束之前橫過馬路，這是我們的考慮。

即係你覺得啲人好得閒喺路中間四圍走？香港人唔係出咗名做嘢爽手咩？同埋，我好主觀咁覺得呢個回覆好搞笑。😂

我覺得用返白色格仔好啲。除咗可以節省成本，亦俾咗一個「行人優先」 嘅訊息。

我哋幾時再見對角過路處？

我都唔知。

運輸署會持續小心觀察沙田和尖沙咀兩個對角過路處的 運作情況大約 6 至 9 個月，仔細考慮行人和駕駛者使用這些設 施的適應情況和行為轉變。吸收這些試行經驗，運輸署會小心 檢討和調整對角過路處的設計，從而制訂一套適合香港交通 情況和行人的設計標準。

尖沙咀對角過路處喺 2024 年 8 月 2 號啟用到依家，啱啱過咗 7 個月，而我哋仲未知測試結果。

不過唔係好想見到對角過路處，我比較想見到人車分離嘅設施。 （除咗被迫之外，我喺宿舍永遠都唔會行窩打老道返火車站，啲車多到痴線，又嘈又多廢氣。）